Вяршыня дасканаласці
Сяргей Луцык у Маларыцкім лясгасе працуе з 2011 г. вадзіцелем на вывазцы, аператарам гідраманіпулятара. Сёлета яму прапанавалі паспрабаваць свае сілы ў раённым этапе прафесійнага конкурсу. Выступленне аказалася вельмі ўдалым.
– Гэта быў мой першы ўдзел у такіх спаборніцтвах, – гаворыць Сяргей Мікалаевіч. – Хоць за больш чым трохгадовы тэрмін працы набыў неабходныя ўменні і навыкі, аднак перад выступленнем усё роўна хваляваўся. Я вырашыў паспрабаваць свае сілы ў конкурсе, а заадно праверыць веды і прафесійнае майстэрства. Як кажуць, самакрытычна ацаніць, на што здатны.
На раённых спаборніцтвах Сяргей Луцык стаў лепшым. Затым ён прадстаўляў Маларытчыну на абласных спаборніцтвах, дзе таксама заняў ганаровае першае месца.
На ХХ чэмпіянат Беларусі сярод вальшчыкаў лесу “Лесаруб-2014”, які праходзіў у Асіповічах, ехаў і павучыцца, і пераняць вопыт.
– Ні пра якую перамогу на ім думак не ўзнікала, – прызнаецца Сяргей Луцык. – Хацелася ў першую чаргу паглядзець на сапраўдных асаў, майстроў сваёй справы. Аднак Фартуна ўсміхнулася, і Сяргей Луцык здолеў набраць найбольшую колькасць балаў. Ён заваяваў два першыя месцы за дакладнасць і акуратнасць выканання заданняў у практыкаваннях “Зборка і разборка зруба” і “Умелы будаўнік”. Улічваліся дакладнасць і час выканання.
Цяпер павучыцца і пераняць вопыт трэба ехаць да Сяргея Луцыка, у Маларыцкі лясгас!
– Сяргей Мікалаевіч, у чым сакрэт такога поспеху?
– Вынікаў не было б, каб не падтрымка жонкі Вольгі, дачушак Настассі і Марыны, – смяецца мой субяседнік і змаўкае, а пасля дадае: – Цяжка сказаць, што асабліва паўплывала на перамогу. Многія, напэўна, фактары. Сілы надае і сам лес. Прызнаюся, што самы лепшы для мяне адпачынак – гэта работа. Акрамя таго не патрэбна, напэўна, ленавацца, варта заўсёды ставіцца да сябе крытычна, адэкватна ўспрымаць пахвалу і крытыку ў свой адрас.
Кіраўніцтва Маларыцкага лясгаса адзначыла, што сакрэт поспеху Сяргея Луцыка заключаецца ў карпатлівай працы, штодзённым імкненні зрабіць даручаную справу як мага лепш. Па жыцці ён прытрымліваецца прынцыпу: «Не трэба быць лепшым за ўсіх – трэба быць хоць бы на крок наперадзе за астатніх».
Мікалай НАВУМЧЫК.
На здымку: Сяргей Луцык, вадзіцель на вывазцы, аператар гідраманіпулятара Маларыцкага лясгаса.
Фота аўтара.
Опубликовано в “ГЧ” 20.09.2014 г.