Лічбавы жывапіс — фантазія Дзмітрыя Луцыка

У фае Маларыцкай раённай бібліятэкі праходзіць выстава работ Дзмітрыя Луцыка. “Фантазія. Мастацтва. Майстэрства” працягвае арт-праект “Свет хобі”, які распачаты ўстановай культуры яшчэ пяць гадоў таму. На працягу некалькіх тыдняў маларытчане  азнаёмяцца з работамі маладога мастака, які цяпер творыць у накірунку лічбавага  жывапісу.

Дзмітрый Луцык — педагог аддзяленняў “Выяўленчае мастацтва” і “Фатаграфія” Маларыцкай школы мастацтваў. Ён скончыў СШ №3 райцэнтра, а пасля — Кобрынскі дзяржаўны мастацкі прафесійна-тэхнічны каледж, набыўшы спецыяльнасці мастака-афарміцеля, дызайнера, настаўніка выяўленчага мастацтва і чарчэння. На двухгадовую адпрацоўку, як малады спецыяліст, быў накіраваны ў ААТ “Рэклама. Дызайн. Свет” (г.Брэст).  Справа, якой займаўся, так спадабалася, што ў таварыстве вырашыў застацца яшчэ на некалькі  гадоў.

— А пасля захацелася паспрабаваць хлеба вольнага мастака, — успамінае Дзмітрый Вітальевіч. – На той час ужо набыў пэўны вопыт,  а веды паглыбіў і замацаваў на практыцы. Да таго ж  пайшлі і заказы. Таму вырашыў працаваць сам на сябе: зарэгістраваўся і стаў індывідуальным прад­пры­мальнікам.

Мастацкай дзейнасцю Дзміт­­рый Луцык у Маларыце займаўся 2 гады. Ён на заказ пісаў модульныя карціны і партрэты, распісваў сцены, ляпіў рэльефы і барэльефы… Аднак у душы Дзмітрый Вітальевіч быў і застаўся настаўнікам. Жа­данне выкладацьперыядычна то слабела, то з новай сілай уз­мацнялася. Дзмітрый Луцык вырашыў ўсё ж такі заняцца педагагічнай дзейнасцю. На гэта ж скіроўвала яго і вучоба на факультэце мастацтваў Гродненскага дзяржаўнага ўні­версітэта імя Янкі Купалы і набытая спецыяльнасць “Педагог-мастак”.

— Для мяне прыкладам заўсёды быў Эдуард Засухін, школьны настаўнік малявання, — гаворыць мой субяседнік. – Мне хацелася быць падобным на яго. Школьныя ўрокі малявання далі многае.

Дзмітрый Луцык малюе з дзя­цінства і першы свой поспех ён памятае добра. У 4 класе быў аб’яўлены конкурс малюнкаў. За некалькі дзён хлопец намаляваў вушастую саву. Работа стала першай не толькі ў СШ №3, але заняла прызавое месца на раённым конкурсе. За ўдзел у спаборніцтве Дзмітрый атры­маў фарбы і пэндзлі. Гэта стала добрым стымулам для далейшай творчасці.

— Дзмітрый Вітальевіч, што такое лічбавы жывапіс?

-Ім я займаюся ўжо 2 гады. Да гэтага пісаў алеем, ствараючы рэалістычныя карціны. Рэалізм – гэта кісларод для лічбавага жывапісу. Карціны, якія ад пачатку да іх поўнага завяршэння, створаны на графічным рэдактары пры дапамозе пяра, — новы накірунак у выяўленчым мастацтве. Камп’ютар у лічбавым жывапісе – такі ж  інструмент, як пэндзаль і мальберт. Камп’ютар­ны мастак, безумоўна, у першую чаргу павінен ведаць асновы акадэмічнага малюнка і жывапісу. Каб яны радавалі вока, таксама неабходна ведаць і ўмець прымяняць законы перспектывы, тэорыю колеру, блікі, рэфлексы, павінна быць развіта пачуццё кампазіцыі і вокамер… Праца пачынаецца з эскіза, пасля прапрацоўваюцца ўсе дэталі.

— На выставе паказаны і модульныя карціны. Што гэта такое?

— Гэта звычайная карціна, якая раздзелена на модулі (часткі, сегменты), звязаныя паміж  сабой агульнай тэматыкай ці ідэяй. Гэта можа быць дыпціх, трыпціх, поліпціх. Любая модульная кар­ціна ўпрыгожвае інтэр’ер кватэры, надае ёй  стыльнасць і своеасаблівую ўнікальнасць. На сцяне яна можа быць замацавана як паралельна адна з адной, так і адвольна.

— Дзмітрый Вітальевіч,  што яшчэ могуць убачыць навед­вальнікі на выставе?

— Шаржы, намаляваныя па фо­таздымках, партрэты па фотаздымках, выкананыя ў стылі поп-арт.

— Тое што робіце, вам як мастаку падабаецца?

— Любы твор жывапісу, у які ўкладзена шмат сіл, затрачана часу, не можа не падабацца. Кожная карціна, у якім бы стылі яна ні была выканана, дарагая і любімая. Свае работы ацэньваю крытычна, прыслухоўваюся да думкі тых,  хто мяне акружае.

— Дзмітрый Вітальевіч, пра што вы марыце як творца?

— Хацелася б, напрыклад, выс­тавіць свае работы ў адной са сталічных мастацкіх галерэй. Было б цудоўна,  каб і ў Маларыце з’явілася свая выставачная зала, суполка творчых людзей. Нядрэнна было б наладзіць ста­­сункі з вядомымі мастакамі во­бласці, рэспублікі.

            Мікалай НАВУМЧЫК.

Поделиться:
  •  
  •  
  •  
  •  
  •  
  •  

Добавить комментарий

Ваш e-mail не будет опубликован.