Маларытчане вяртаюцца са службы. Сяргей Ярмалюк з в. Перавое
У ваенным камісарыяце Маларыцкага раёна не толькі ўрачыста праводзяць на воінскую службу юнакоў, але і сустракаюць тых, хто выканаў пачэсны абавязак.
Важная падзея адбылася ў жыцці Сяргея Ярмалюка з в.Перавое. Ён дэмабілізаваўся з Узброеных Сіл і адразу прыехаў ў ваенкамат, каб стаць на ўлік. Тут юнака сустракалі ваенны камісар раёна Аляксандр Праўдзін, намеснік ваеннага камісара Аляксандр Каралькоў і начальнік групы прызыву на ваенную службу Павел Канькоў. Яны пажадалі Сяргею дабра і здароўя, поспехаў ва ўсім, правільна вызначыцца з далейшай жыццёвай дарогай.
Зрэшты, Сяргей Ярмалюк гэта ўжо зрабіў. Яшчэ да службы ў арміі ён навучаўся ў Полацкім лясным каледжы. Цяпер юнак плануе працягваць вучобу ў гэтай навучальнай установе, а пасля яе заканчэння – уладкавацца на працу ў Маларыцкі лясгас.
– Сяргей, сёння многія ставяцца да службы ў арміі адмоўна, бо напалоханы рознымі чуткамі і здагадкамі. Іх пужае многае, у тым ліку – і “дзедаўшчына”. Ці ёсць яна?
– З “дзедаўшчынай” сустракацца не давялося, бо ў нас яе не было, – гаворыць Сяргей Ярмалюк. – Паўтара года службы прайшлі для мяне як бы незаўважна. Служыць пайшоў, не задумваючыся ні на хвіліну. Арміі баяцца зусім не трэба. Гэта – своеасаблівая школа жыцця. Яна не толькі выдатна дысцыплінуе, прывучае да парадку, але і фарміруе, загартоўвае характар. Нічога дрэннага пра сваю службу сказаць не магу. Мне пашанцавала, бо адчуў, што такое ўзаемавыручка, сапраўдная падтрымка сяброў, іх надзейнае плячо. Наш узвод быў адзінай дружнай сям’ёй, у якой панавалі законы еднасці і брацтва.
Сяргей Ярмалюк служыў запраўшчыкам (паветрам) у 115-м зенітным ракетным палку (г.Брэст) у аддзяленні захоўвання, перагрузкі і транспартавання. Камандаванне часці характарызуе Сяргея станоўча, звяртае ўвагу на такія яго рысы характару, як раўнавага, мэтанакіраванасць, настойлівасць, рашучасць, стрыманасць. За разумную ініцыятыву, дысцыплінаванасць, цвёрдую жыццёвую пазіцыю, якія праяўлены за час праходжання ваеннай службы, юнак атрымаў Пісьмовую падзяку ад камандавання палка.
Намеснік ваеннага камісара Аляксандр Каралькоў звярнуў увагу на тое, што Сяргей Ярмалюк – прыклад для іншых юнакоў Маларытчыны не толькі ў плане добрасумленнага выканання свайго грамадзянскага абавязку. Згодна з Кодэксам Рэспублікі Беларусь аб адміністрацыйных правапарушэннях (артыкул 28.5) за парушэнне правілаў воінскага ўліку наступае адміністрацыйная адказнасць у выглядзе штрафу ад 2 да 3 базавых велічынь. Каб такога не адбылося, той, хто дэмабілізаваўся з арміі, абавязкова павінен з’явіцца ў ваенкамат у месячны тэрмін. Сяргей Ярмалюк стаў на ваенны ўлік у дзень дэмабілізацыі.
Мікалай НАВУМЧЫК.