Ганаровыя грамадзяне Маларыцкага раёна

Наша Маларытчына… Тут жывуць пра­цавітыя і таленавітыя людзі, якія шмат сіл аддаюць таму, каб край наш быў самым прыгожым, зямля радавала з году ў год ураджаем, аб раёне ведалі далёка за яго межамі і кожнае новае пакаленне ганарылася сваёй маленькай радзімай. Значнымі дасягненнямі праславілі сябе і свой раён многія яго жыхары. Але ёсць на Маларытчыне і свая галерэя пашаны, якая сабрала прозвішчы тых, хто ўнёс асаблівы ўклад у развіццё раёна і за гэта ўдастоены звання ганаровага грамадзяніна Маларыц­кага раёна. У 2015 годзе такое зван­не было прысвоена двум нашым землякам — Леаніду Тараненка, які праславіў Беларусь і сваю маленькую радзіму ў сусветным  спорце, і тройчы ардэнаносцу,заслужанаму работніку сельскай гаспадаркі Беларусі Леаніду Ляонаву. У 2018 годзе спіс ганаровых грамадзян раёна папоўніла прозвішча яшчэ аднаго сапраўднага гаспадара на зямлі, старшыні СВК “Дарапеевічы” Васіля Юхімука. А на апошняй сесіі раённага Савета дэпутатаў у снежні 2019 года было прынята рашэнне прысвоіць ганаровае званне яшчэ двум жыхарам Маларытчыны – былому кіраўніку раёна Сцяпану Герасімуку і народнаму майстру Рэспублікі Беларусь Сцепанідзе Сцепанюк.

Леанід Тараненка

Заслужаны майстар спорту Рэспублікі Беларусь, чэмпіён XXII Алімпійскіх гуль­няў у Маскве 1980-га года, сярэбраны прызёр XXV алімпійскіх гульняў 1992 года ў Барселоне, чэмпіён свету ў 1980 г. у першай цяжкай вазе і ў 1990 г. – у другой цяжкай вазе, чэм­піён Еўропы 1980 г. у першай і трохразовы чэмпіён у дру­гой цяжкай вазе 1988, 1991–1992 гг., двухразовы чэмпіён Спартакіяды народаў СССР, уладальнік 19 сусветных рэкордаў. Леанід Аркадзьевіч узнагароджаны ордэ­намі Дружбы народаў і Працоўнага Чырвонага Сцяга. У 2019 го­дзе яму прысвоена званне ганаровы грамадзянін Брэсцкай вобласці.

________________________

Леанід Ляонаў

Леанід Іванавіч – заслужаны работнік сельскай гаспадаркі Рэспублікі Беларусь. 48 гадоў ён узначальваў калгас “Запаветы Леніна”. Пад кіраўніцтвам Леа­ніда Ляонава гас­­падарка імкліва раз­вівалася — першая ў раёне пачала праводзіць ме­лія­рацыю, тут была створана трывалая кармавая база, ішло будаўніцтва ферм, жылля і аб’ектаў сацыяльна-культурнай сферы, праводзілася газіфікацыя Хаці­сла­ва. Аб “Запаветах Ле­ніна” ведалі далёка за межамі раёна. За шматгадовую старанную працу Леанід Ляонаў узнагароджаны ордэнамі Леніна, Кастрычніцкай рэва­лю­цыі, “Знак Пашаны”. 

 

 

 

 

 

 

__________________________

Васіль Юхімук

Васіль Фядосавіч больш за 30 гадоў узначальвае калектыў сельгаскааператыва “Дарапеевічы”. Дзякуючы яго ўмеламу кіраўніцтву гаспадарка дабіваецца высокіх паказчыкаў. У “Дарапеевічах” вядзецца актыўнае будаўніцтва і мадэр­нізацыя вытворчых аб’ектаў, будуецца жыллё, ствараюцца спрыяльныя ўмовы для жыцця і працы. За вялікі ўклад у развіццё сельскагаспадарчай галіны Васіль Юхімук узнагароджаны ордэнам Айчыны III  ступені і медалём “За трудовое отличие”.

 

 

 

 

 

__________________________

Сцепаніда Сцепанюк

Простая вяско­вая жанчына з Дара­пеевічаў стала знакавай постаццю для культуры Ма­ла­­рытчыны. Яна – захавальніца традыцый ткацтва. Дзякую­чы Сцепанідзе Аляк­сееўне ўдалося ад­навіць важнейшую частку гісторыка-куль­­турнай спадчыны раёна – унікальную тэхналогію стварэння традыцыйнага адзен­ня,  характэрнага толь­кі для Маларытчыны. Свае сакрэты і ўменне знакамітая ткачыха, майстар народнай творчасці Сце­паніда Сцепанюк перадае цяпер сваім вучням.

______________________

Сцяпан Герасімук

Званне ганаровага грамадзяніна Маларытчыны Сцяпан Герасімук заслужыў сваім значным аса­біс­тым укладам у развіццё Маларыцкага раёна,  які Сцяпан Васільевіч узначаліў у складаныя 90-я га­ды мінулага стагоддзя. Сем гадоў яго кі­раў­ніцтва былі часам выпрабаванняў. Але, нягледзячы на складанасці, звязаныя з развалам СССР,  яму, як кі­раўніку, удалося не толькі захаваць, але і прымножыць матэрыяльную базу раёна. Для Сцяпана Ге­расімука заўжды на першым месцы быў просты чалавек з яго праблемамі. За гэта, у першую чаргу, а яшчэ за жыццёвую мудрасць паважаюць яго землякі.