«Падтрымка бізнес-праектаў» Сувенірная прадукцыя з саломкі Алы Назарук (Маларыцкі раён)

Як мы паведамлялі ўжо, на Брэстчыне працягваецца рэа­лі­зацыя сацыяльнага праекта “Пад­трымка жанчын у фермерстве, агратурызме і рамесніцтве”, які быў ініцыіраваны грамадскім аб’яд­наннем “Адпачынак у вёсцы” ў партнёрстве з Брэсцкім аб­ласным выканаўчым камітэтам пры фінансавай падтрымцы дабрачыннага Фонду “The Coca-Cola Foundation”. Журы разгледзела во­семдзесят дзевяць бізнес-іні­цыятыў з чатырнаццаці  раёнаў вобласці і выбрала пяцьдзясят леп­шых. У гэты лік трапіла і пяць бізнес-праектаў з Маларытчыны. Фінансавую падтрымку атрымала і Ала Назарук.

Ала Назарук – майстар народных рамёстваў Маларыцкага раённага цэнтра народнай творчасці, кіраўнік раённага аматарскага аб’яднання “Скарб талентаў”. Яна ўжо не адзін год стварае непаўторныя, дзівосныя па сваёй прыгажосці саламяныя вырабы. Работамі Алы Сцяпанаўны захапляліся ў Польшчы, Украіне, краінах Балтыі падчас розных выстаў, пленэраў, фес­тываляў, майстар-класаў… Та­ленавітасць і прафесіяналізм самабытнай майстрыхі пацвярджаюць шматлікія ўзнагароды з розных творчых спаборніцтваў.

– Мэта маёй ініцыятывы “Традыцыі і сучаснасць саломапляцення”, – гаворыць Ала Назарук, – наладзіць выраб сувенірнай прадукцыі з саломкі – прыроднага экалагічна чыстага ма­тэрыялу (нацыянальныя лялькі, са­ламяныя абярэгі, а таксама лапці, ва­лёнкі, званочкі сувенірныя), пляценне мужчынскіх і жаночых капелюшоў, жа­ночых какошнікаў як для калектываў, так і для  прыватных асоб, прадметаў, якія выкарыстоўваюцца ў штодзённым побыце (дэкаратыўныя сумачкі, кошыкі, цукерніцы, пано і інш.). Таксама мяркую, што будзе праведзена некалькі  майстар-класаў па саломапляценні для дзяцей і дарослых.

Ала Назарук ужо атрымала неабходнае абсталяванне, расходныя матэрыялы і пачала рэалізоўваць свой праект, які разлічаны на некалькі месяцаў.

– Гэта мне блізкае з дзяцінства. Са­­­ломапляценне не толькі хобі, але, на­пэўна, у некаторай ступені яшчэ і сэнс жыцця. Саломапляценнем за­ха­пілася яшчэ ў класе пятым. Аднак сур’ёзна гэтым стала займацца пасля заканчэння Арэхаўскай СШ. У Арэхаве раней быў філіял ад Брэсцкай фабрыкі сувеніраў “Славянка”. Туды на працу і ўладкавалася. Спачатку пляла лялькі, абручы, а пасля – больш складаныя рэчы,  – расказвае Ала Сцяпанаўна.

Саломапляценне –  частка  традыцыйнай народнай культуры. Лічу, што гэтае рамяство цяпер неабходна адраджаць, паказваць прыгажосць і непаўторнасць саламяных вырабаў. Трэба захаваць лепшыя традыцыі беларускага саломапляцення, перадаць іх маладому пакаленню, прапагандаваць. Пераканана, што  рэалізацыя маёй бізнес-ініцыятывы якраз і будзе гэтаму садзейнічаць.

На пытанне, як і дзе плануе збываць вырабленую прадукцыю, Ала Сцяпанаўна адказала:

– Я – зарэгістраваны рамеснік. Плануецца, што вырабленая падчас рэалізацыі сацыяльнага праекта прадукцыя будзе знаходзіць свайго пакупніка не толькі на раённым і аб­ласным, але і на рэспубліканскім і міжнародным узроўнях падчас розных выстаў, пленэраў, магчыма, таксама – і праз інтэрнет-магазіны.                                                                                            

Мікалай НАВУМЧЫК.

Поделиться:
  •  
  • 10
  •  
  •  
  •  
  •  

Добавить комментарий


error: Незаконное копирование материалов сайта запрещено!