ЛЮБІЦЕ СВОЙ АЎТАМАБІЛЬ!

На дварэ вясна, за ёю прыйдзе лета, і ўладальнікі “жалезных коней” будуць больш актыўна задзейнічаць іх. Каб наш транспарт на­дзейна служыў нам, мы павінны любіць яго, клапаціцца аб ім, своечасова “лячыць” пры нязначных “недамаганнях”, не дапускаць да такога стану, калі аўтамабіль, скутар ці матацыкл назаўсёды выйдуць са строю.
А дапамагчы нам у гэтым заўсёды гатовы работнікі дыягнастычнай станцыі № 75, якая амаль 2 гады таму назад была адкрыта ў в. Замшаны.
Начальнік станцыі Віктар Бурштын расказвае:
– Не магу не адзначыць, што па выніках работы за мінулы год наша дыягнастычная станцыя № 75 УП “Белтэхагляд” аказалася дзесьці ў сярэдзіне сярод усіх падобных станцый вобласці. Хаця мінулы год быў для нас толькі пробным.
Наогул, адкрыццё сваёй стацыянарнай дыягнастычнай станцыі – вялікая выгода для аўтаўладальнікаў нашага раёна. Ехаць цяпер нікуды не трэба, выстойваць у доўгіх чэргах таксама і нават разлік за тэхагляд – непасрэдна на месцы.
А наша станцыя, можна смела сказаць, адпавядае самым сучасным патрабаванням. Адно толькі нямецкае абсталяванне чаго варта.
Мы маем дазвол на праверку і допуск да ўдзелу ў дарожным руху ўсіх відаў транспарту, пачынаючы ад мапеда.
І хаця ў апошні час ва Украіне, у Расіі ды і ў нашай Беларусі вядуцца размовы наконт таго, што тэх­агляд – гэта працэдура лішняя, не раздзяляю такіх меркаванняў, тым больш, што ў нас у краіне сама працэдура тэхагляду намнога больш простая, чым у іншых краінах. Ды і калі чалавек даставіў сваю машыну на станцыю, дзе яму назвалі ці падказалі непаладкі ў ёй, якія ён сам не заўважыў, і яму ж больш спакойна. Ён можа смела ўдзельнічаць у дарожным руху. Тым больш, што ў нас у рэспубліцы ўсё большыя і большыя патрабаванні прад’яўляюцца да аўтатранспарту з пункту гледжання экалогіі: у любой машыне выкіды шкодных рэчываў павінны адпавядаць норме. А мы дызельныя аўтамабілі правяраем на дымнасць, карбюратарныя ці інжэктарныя – на таксічнасць выхлапных газаў.
– Віктар Вітальевіч, гледзячы на аўтамабіль, Вы, напэўна, можаце адразу вызначыць: ён для гаспадара – любімы сябар ці проста сродак перамяшчэння?
– Іншы раз, нават гледзячы на вадзіцеля, ужо можна смела рабіць такі вывад. Многія аўтаўладальнікі з году ў год падтрымліваюць свой транспарт у ідэальным стане. Па “ўзросту” ён быццам бы і не новы ўжо, але ж у такім тэхнічна спраўным стане, што хочацца паставіць у якасці ўзору. А ёсць і такія, што ездзяць на сваім аўтамабілі да таго часу, пакуль, як кажуць, ногі на зямлі стаяць не будуць.
– Віктар Вітальевіч, калі адкрывалася новая станцыя, планавалася, што наступным крокам у развіцці сферы падобных паслуг у нас у раёне стане будаўніцтва побач з новай дыягнастычнай станцыяй станцыі тэхабслугоўвання, каб кліент, які даставіў транспарт на тэхагляд, меў магчымасць адразу ліквідаваць і ўсе няспраўнасці ў ім. Скажыце, што-небудзь робіцца ў гэтым плане?
– Адкрыць побач з дыягнастычнай станцыяй станцыю тэхабслугоўвання пакуль няма магчымасцей, хаця сапраўды планавалася. Усё ўпіраецца ў адсутнасць фінансаў, а нашу сферу праблемы фінансавага плана таксама не мінулі. Магчыма, у перспектыве нешта зменіцца.
– Віктар Вітальевіч, што б Вы хацелі пажадаць уладальнікам транспартных сродкаў?
– Любіце свой аўтамабіль. Толькі тады ён сапраўды будзе сябрам вам, а не стваральнікам лішніх клопатаў і турбот.
Ірына КАСЦЕВІЧ.
НА ЗДЫМКУ: начальнік дыягнастычнай станцыі № 75 УП “Белтэхагляд” Віктар БУРШТЫН.
Фота Алега КРЭМЯНЕЎСКАГА.