Вольга Краско з 3 жніўня ўзначаліла Маларыцкі раённы цэнтр культуры

У Маларыцкага раённага цэнтра культуры — новы дырэктар. З трэцяга жніўня дзяржаўную ўстанову культуры ўзначаліла Вольга Краско.

Вольга Васільеўна на­радзілася і вырасла ў Маларыце, вучылася ў СШ №3 райцэнтра. У 2011 годзе скончыла Брэсцкі дзяржаўны ўніверсітэт імя А.С. Пушкіна (набыла спецыяльнасць настаўніка біялогіі), а ў 2013 — Бела­рускі дзяржаўны ўні­версітэт культуры і мастацтва (рэжысёр святаў і відовішчаў).

Сваю працоўную дзейнасць Вольга Васільеўна пачынала выхавальнікам у я/с №2 Маларыты, была мастацкім кіраўні­ком, а затым на працягу амаль пяці гадоў — дырэктарам Збуражскага СДК. З верасня 2011 года да назначэння на новую пасаду працавала настаўнікам тэат­ральнага аддзялення Маларыцкай дзіцячай школы мастацтваў. Тут найбольш поўна і ярка раскрыўся талент Вольгі  Краско як прафесіянала і спецыяліста высокага класа. Яе вучні ўзнагароджаны грама­тамі і дыпломамі за ўдзел у розных спабор­ніцтвах абласнога (тры ўзнагароды), рэспублі­канскага (пяць) і міжна­роднага ўзроўняў (сорак дзве). Створаны Вольгай Васільеўнай аматарскі дзіцячы калектыў “Вясёлка” не адзін год ра­даваў гледачоў сваімі цікавымі пастаноўкамі.

Акрамя таго, Вольга Краско з 2017 года з’яў­ляецца старшынёй Маларыцкай раённай арганізацыі Беларускага прафесійнага саюза работнікаў культуры, інфармацыі, спорту і турызму. Таму многія аспекты функцыянавання ўстаноў культуры,  праблемныя пытанні,  над вырашэннем якіх неабходна працаваць, добра ведае.

— Адну з асноўных задач на новай паса­дзе бачу ў актывізацыі дзейнасці работнікаў культуры раёна, — гаворыць Вольга Краско. —  Для гэтага ў нас ёсць усё неабходнае: і кадры, і матэрыяльная база, і магчымасці. Задумак, канечне, шмат. Буду спрабаваць паступова іх рэалізоўваць. Разу­мею, што дырэктарскі партфель не з лёгкіх,  але пераадольваць пэўныя цяжкасці мне не прывыкаць. Пры жаданні можна справіцца з любой пастаўленай задачай.

Між іншым, у склад Маларыцкага раённага цэнтра культуры цяпер уваходзіць ГДК, раённы цэнтр народнай творчасці, аўтаклуб, дванаццаць сельскіх дамоў культуры, а таксама – два сельскія клубы, два дамы фальклору, Дом рамёстваў. Асноўнымі задачамі Маларыцкага раённага цэнтра культуры з’яўляецца зберажэнне і развіццё нацыянальнай культуры, традыцыйных форм культурнай дзейнасці і адпачынку, аматарскай мастацкай творчасці, раскрыццё і падтрымка творчых ін­дывідуальнасцей і та­лентаў, носьбітаў аўтэн­тычнага фалькло­ру. Установа займаец­ца аргані­зацыяй і правя­дзеннем розных фес­тываляў,  агля­даў, кон­курсаў, выстаў, канцэр­таў, спектакляў,  маса­вых тэатралі­зава­ных святаў і прадстаў­ленняў, народных гулян­няў, абрадаў…

Мікалай НАВУМЧЫК.

Поделиться:
  •  
  • 63
  •  
  •  
  •  
  •  

Добавить комментарий


error: Незаконное копирование материалов сайта запрещено!