Маларыцкія майстры выткалі ручнікі да абласных Дажынак

Напрыканцы мінулага тыдня дырэктар Маларыцкага раённага цэнтра народнай творчасці Валянціна Струнец і майстар народных рамёстваў Святлана Луцык завяршылі работу пад выкананнем  спецыяльнага заказу. Жанчыны на працягу амаль паўтара месяцаў да абласнога фестывалю-кірмашу працаўнікоў вёскі “Дажынкі-2020”, які пройдзе 12 верасня ў аг. Дзівін (Кобрынскі раён),  выткалі шаснаццаць ручнікоў, а таксама два касцюмы для вядучых святочнай урачыстасці. Падчас адкрыцця “Дажынак-2020” дзяўчаты  вынесуць караваі хлеба з новага ўраджаю менавіта на маларыцкіх ручніках. Кожны з іх мае  даўжыню два метры сорак сантыметраў.

Касцюмы вытканы ў тэхніцы “кажушком”, усе ручнікі — “наборам”.  У іх захаваны ўзоры, арнаменты і асаблівасці маларыцкага строю, а таксама яго колеравая гама (бардовая).

Тканыя ручнікі  мала­рыцкіх  майстроў атры­маліся надзвычай пры­гожымі. А інакш і быць не магло,  таму што Ва­лянціна Мікалаеўна і Святлана Сцяпанаўна ўклалі ў вырабы таям­ніцу сваёй душы, за­ткаўшы ў іх часцінку сябе і напоўніўшы глы­бінным  зместам “белую  дарогу  жыцця”  па­лат­на.

Маларыцкія ткачыхі, каб выканаць заказ у вызначаны тэрмін,  заставаліся ткаць пасля заканчэння рабочага дня,  сядалі за кросны і ў выхадныя дні.

— За ткацкім станком не вельмі і паспяшаешся, — гаворыць Валянціна Мікалаеўна. — Праца ткачыхі доўгая і карпатлівая, патрабуе цярпення, уважлівасці, засяроджанасці, усед­лівасці і,  вядома ж, творчага запалу.

Між іншым, усе вытканыя ручнікі маюць аднолькавы ўзор. Маларыцкі арнамент — гэта своеасаблівая кніга народнай мудрасці, у якой  зашыфраваны  ўзор душы нашых продкаў. У кожным вытканым сантыметры тканіны, у кожным шыўку ўзору заключаны глыбокі сэнс. У арнаменце як бы сканцэнтраваны просьбы, мары, надзеі нашых продкаў,  іх добрыя пажаданні родным і блізкім,   адчуванні шчасця… Вытканыя ручнікі – гэта своеасаблівыя абярэгі чалавека. Тым, хто іх выкарыстоўвае,  спадарожнічае дабрабыт і шчасце.

Мікалай НАВУМЧЫК.