Адкуль узяўся лагатып “Таптышка”? (Маларыцкі раён)
“Фішка” Маларыцкага кансервавагароднінасушыльнага камбіната – кансервы на аснове садавіны для дзяцей ранняга ўзросту без кансервантаў, фарбавальнікаў, загушчальнікаў і ГМА.
– Аднак каб іх ахвотна куплялі, цяпер недастаткова адной якасці прадукцыі, хоць гэта мы лічым адзін з самых галоўных крытэрыяў, – гаворыць дырэктар прадпрыемства Юрый Вітрук. – Каб быць канкурэнтаздольным на рынку, каб прадаць хутка свой тавар, неабходна найперш яго распазнавальнасць і запамінанне пакупніком. Гэта з’яўляецца прамым фактарам уплыву на аб’ём продажу. Вельмі добра, што спажывец успамінае брэнд, калі бачыць лагатып і ў яго ўзнікаюць пэўныя станоўчыя асацыяцыі. Выява брэнда павінна лёгка запамінацца, быць яркай і арыгінальнай. Думаю, што гэтым крытэрыям і адпавядае наша гандлёвая марка “Таптышка”.
– Пра свой брэнд мы задумаліся напачатку 2000-ых гадоў, – гаворыць былы дырэктар камбіната Таццяна Камянчук. – Час патрабаваў, каб у прадпрыемства была свая гандлёвая марка. Гэта давала нам пэўныя перавагі. За дапамогай мы звярнуліся ў Дзяржаўны камітэт па навуцы і тэхналогіях Рэспублікі Беларусь. Неўзабаве нам прапанавалі некалькі магчымых варыянтаў (узораў) гандлёвай маркі. На прадпрыемстве было наладжана іх абмеркаванне. Большасць выказалася за вясёлага мядзведзіка, напэўна, прыгадваючы Вінні-Пуха з аднайменнага мультфільма. І толькі пасля гэтага дырэктар завода Іван Камянецкі зацвердзіў будучы брэнд. Першы, чорна-белы варыянт у выглядзе галавы медзведзяняці, якое ўсміхаецца, у авале, з надпісам уверсе “Таптышка”, быў зарэгістраваны ў дзяржаўным рэестры таварных знакаў і знакаў абслугоўвання Дзяржаўнага камітэта па навуцы і тэхналогіях Рэспублікі Беларусь 2 верасня 2003 года.
– Таццяна Уладзіміраўна, чаму быў выбраны варыянт напісання “Таптышка”? Ці няма ў слове арфаграфічнай памылкі?
– Таптыгін – народна-паэтычная і жартаўлівая назва мядзведзя ў казках, якая звязана з паходкаю звера, з асаблівым тупатам пры яго перамяшчэнні. Адсюль і паходзіць памяншальна-ласкальнае слова Таптыжка. Мы ж у назву брэнда ўклалі зусім іншы сэнс. Пры яго выбары зыходзілі з таго, што імя нашага медзведзяняці Таптышкі звязана не са словам «тупаць», а са словам «таптаць». У пераносным значэнні яно абазначае «есці многа, са смакам і з апетытам». На камбінаце было прынята рашэнне пагадзіцца менавіта з такім напісаннем слова. Цяпер у Беларусі менавіта “Таптышка” асацыіруецца з дзіцячым харчаваннем, якое выпускае Маларыцкі кансервавагароднінасушыльны камбінат.
– 4 лістапада 2015 года таварны знак прадпрыемства “Таптышка” быў перарэгістраваны ў Нацыянальным цэнтры інтэлектуальнай уласнасці. Ён змяніў свой выгляд. Чаму? – гэтае пытанне задаю начальніку вытворча-выпрабавальнай лабараторыі камбіната Кацярыне Паздзяйкінай.
– Сапраўды, у 2015 годзе наш таварны знак набыў сённяшні выгляд – сімпатычнага медзведзяняці, якое, схіліўшы галаву ўлева, усміхаецца. Змяненне выявы брэнда прадыктавана патрабаваннямі часу для таго, каб павысіць увагу, прыцягнуць да нашай прадукцыі як даўніх, так і новых пакупнікоў. Такі стан спраў быў прадыктава-ны актыўнай маркетынгавай стратэгіяй – рэбрэндынгам. Ад гэтага мы не маглі застацца ўбаку.
Кансервавагароднінасушыльны камбінат не стаіць на месцы. Па словах старшыні райвыканкама Міхаіла Бацэнкі, цяпер прапрацоўваецца пытанне пастаўкі на прадпрыемства яшчэ адной лініі з выкарыстаннем упакоўкі з камбінаваных матэрыялаў тыпу “Паўч”. Гэта не менш чым у два разы павялічыць аб’ём прадукцыі, якая выпускаецца. Дарэчы, першая такая лінія тут была ўсталявана ў 2015 годзе.
Прадпрыемства паступова пашырае рынкі збыту. Цяпер на чарзе – Грузія. Між іншым, таварны знак “Таптышкі” цяпер зарэгістраваны ў Міжнародным Бюро Сусветнай арганізацыі інтэлектуальнай уласнасці Міжнароднай сістэмы таварных знакаў (г.Жэнева) у Расіі, Казахстане, Кіргізстане, Польшчы і Кітаі.
Мікалай НАВУМЧЫК.