Аграсядзібы на Маларытчыне
Сельскі турызм, адпачынак у вёсцы ў апошнія гады становяцца папулярнымі. Яны запатрабаваны. Пра гэта можна меркаваць на прыкладзе Маларыцкага раёна.
– Цяпер у нас зарэгістравана 16 суб’ектаў агратурызму, – гаворыць дырэктар Маларыцкага раённага фізкультурна-спартыўнага клуба Таццяна Тышкевіч. – 12 з іх аказваюць паслугі насельніцтву, 4 аграсядзібы пакуль знаходзяцца на рэканструкцыі. Цяпер аграсядзібы ёсць у такіх населеных пунктах раёна, як Лукава, Гусак, Макраны, Антанова, Ужова, Дубічна, Отчын, Хаціслаў, Ляхаўцы, Маларыце (ва ўсіх па адной) і Пажэжыне (дзве).
Дарэчы, першая на Маларытчыне аграсядзіба “Дамашні ачаг” (уласнік Ганна Алесіюк, аг. Лукава) была зарэгістравана яшчэ ў 2008-м годзе. Якраз уласнік гэтай аграсядзібы, а таксама ўласнік “Уладзімірскай сядзібы” (в.Пажэжын) атрымалі фінансавую дапамогу на рэалізацыю праектаў у сферы агратурызму па Указу Прэзідэнта Рэспублікі Беларусь.
Пачынаючы з 2015 года, на Маларытчыне штогод з’яўляюцца новыя аграсядзібы. Напрыклад, у 2020 годзе, нягледзячы на няпростую эпідэміялагічную сітуацыю па каронавіруснай інфекцыі, пачалі функцыянаваць яшчэ два аб’екты агратурызму. З 6 ліпеня мінулага года свае дзверы гасцінна расчыніла сядзіба “Дом у вёсцы” ў аг.Ляхаўцы (уласнік Галіна Самасюк).