Маларытчане на тэлегульні “Я ведаю!”

“Я ведаю!” – інтэлектуальная тэлевізійная віктарына для вучняў 5-11 класаў, якая выходзіць на тэлеканале “Беларусь 1”. Гэта сумесны праект Белдзяржтэлерадыёкампаніі і Міністэрства адукацыі Рэспублікі Беларусь. Мэта яго – знайсці знаходлівых, эрудзіраваных, дапытлівых, ініцыятыўных вучняў. Прыняць удзел у шоу “Я ведаю!” можна толькі адзін раз у чатыры гады.

Нядаўна вучаніца 5 “А” класа раённай гім­назіі  Валерыя Харык і вучань 7 “Б” класа раённай гімназіі Мікіта Рэкруткін удзельнічалі ў здымках пятага сезону тэлевізійнага праекта “Я ведаю!”, якія праходзілі на кінастудыі “Беларусьфільм”.  Валерыя і Мікіта да ўдзелу ў інтэлектуальным  спабор­ніцтве рыхтаваліся пад кіраўніцтвам трэнера, настаўніка раённай гімназіі Леаніда Лук’янчука.

Леанід Ксенафонтавіч расказаў, што ў першым туры прымаюць удзел 12 чалавек з розных рэгіёнаў краіны. Ім зачытваецца па чарзе 12 пытанняў (на роздум на кожнае з іх даецца па 7 секунд), якія патрабуюць адказаў “так” ці “не”. Восем мацнейшых удзельнікаў пераходзяць у другі тур, дзе прапаноўваецца па 10 пытанняў з трыма варыянтамі адказаў (на абдумванне кожнага пытання – 10 секунд). У трэці тур трапляе толькі чатыры ўдзельнікі, якія набралі найбольшую колькасць балаў у папярэднім. Тут неабходна даць правільныя адказы на 10 пытанняў без варыянтаў. У чацвёртым туры сустракаецца толькі два ўдзельнікі, якім прапаноўваецца 10 пытанняў з розных галін ведаў без варыянтаў адказаў.

Маларыцкія гімназісты прадэманстравалі добры вынік на гульні “Я ведаю!”  Аднак Валерыя Харык і Мікіта Рэкруткін трапіць у  трэці тур не змаглі.

Між   іншым,  вучні раён­­­най гімназіі ўжо бралі ўдзел у гэ­тай інтэлек­туаль­­най тэле­гуль­­ні. Го­нар раёна аба­ра­ня­­ла восем вучняў раён­най гімназіі ў другім сезо­не. Гэта пяцікласнікі Аляксей Карпук і Мікалай Пачын­чук (эфір 12 студзеня 2019), шасцікласнік Іван Грэцкі (эфір 26 студзеня), сямікласнік Яўген Бурда (эфір 2 лютага), васьмікласнікі Мікіта Сезік і Андрэй Алесік (эфір 16 лютага), дзевяцікласнікі Уладзіслаў Шульжык і  Сафія Кобак (эфір 2 сакавіка).

У сваіх ўзроставых катэгорыях лепшымі ў паўфіналах сталі Яўген Бурда і Уладзіслаў Шульжык. Яўген за час адказнай гульні здолеў набраць 53 балы, а Уладзіслаў – 49. Яны, як пераможцы, прайшлі у фінал гэтага інтэлектуальнага спаборніцтва. Там ма­ларытчане таксама прадэманстравалі доб­рыя веды, аднак да перамогі хлопцам трош­кі не хапіла балаў. Яўген заняў чацвёртае выніковае месца, а Уладзіслаў увайшоў у дзясятку мацнейшых ігракоў.  Між іншым, паглядзець перадачы ў запісе з удзелам маларытчан можна на сайце тэлеканала “Беларусь-1” па адрасе: http://www.tvr.by.

Праграмы “Я ведаю!” з удзелам Валерыі Харык і Мікіты Рэкруткіна выйдуць у эфір на тэлеканале “Беларусь 1” у студзені  наступнага года.

Мікалай  НАВУМЧЫК.