Актыўна супрацоўнічаць і пашыраць сувязі

У раённай гімназіі адбылася сустрэча старшакласнікаў са старшынёй Маларыцкага раённага Савета дэпутатаў Алегам Якубчыкам і  старшынёй маладзёжнага парламента пры Маларыцкім раённым Савеце дэпутатаў Валерыем Бурштынам.

Падчас мерапрыемства размова ішла аб тым, як пачыналася інтэграцыя Беларусі і Расіі, калі і кім быў падпісаны Дагавор аб супольнасці дзвюх краін. Алег Якубчык засяродзіў увагу прысутных на асноўных дакументах, якія адкрылі шлях для якасна новага ўзроўню яднання брацкіх краін і народаў і вызначылі канчатковую мэту інтэграцыі – стварэнне Саюзнай дзяржавы. Між  іншым, Саюзны дагавор быў падпісаны 2 красавіка 1997 года. Гэтая дата і адзначаецца як Дзень яднання двух славянскіх народаў.

За гады існавання Саюзнай дзяржавы былі рэалізаваны і працягваюць ажыццяўляцца шматлікія праграмы. Найперш яны звязаны з навукай, абаронай, бяспекай і сацыяльнай сферай. Ёсць таксама распрацоўкі ў галіне энергетыкі,  эканомікі, сельскай гаспадаркі. Сувязі паміж  Рэспублікай Беларусь і Расійскай Федэрацыяй мацнеюць штогод,  становяцца больш трывалымі. Маларытчына не стаіць убаку ад гэтага працэсу. Такое яднанне закладзена гістарычна,  змацавана мноствам чалавечых лёсаў. Расіяне жывуць на Маларытчыне, а маларытчане – у Расіі. І там,  і там людзі адчуваюць сябе камфортна, утульна, у бяспецы. Аб тым,  што сувязі паміж   рэгіёнамі Беларусі і Расіі пашыраюцца, мацнеюць, сведчыць і  відэамост,  які нядаўна адбыўся паміж  кіраўніцтвам Маларыцкага раёна і адміністрацыяй Іркуцкага раёна Іркуцкай вобласці Расіі. Ён прайшоў па ініцыятыве грамадскай арганізацыі “Федэральная нацыянальна-культурная аўтаномія беларусаў Расіі” і  рэгіянальнай нацыянальна-культурнай аўтаноміі беларусаў Іркуцкай вобласці  “Беларусы Прыбайкалля”. Дарэчы,  цяпер на тэрыторыі Іркуцкай вобласці  пражывае каля 14 тысяч этнічных  беларусаў, а ў кожнай пятай сям’і ёсць беларускія карані. Па словах Алега Якубчыка,  падчас анлайн-сустрэчы абмяркоўваліся пытанні падпісання пагаднення аб супрацоўніцтве,  у тым ліку – і ў сферы маладзёжнай палітыкі. Алег Пятровіч запрасіў старшакласнікаў раённай гімназіі  да актыўнага супрацоўніцтва і ўдзелу ў пашырэнні сувязей з моладдзю Іркуцкага раёна. Каардынатарам гэтай справы ў нашым раёне з’яўляецца мала­дзёжны парламент пры Маларыцкім раённым Савеце дэпутатаў.

Напрыканцы сустрэчы старшыня раённага Савета дэпутатаў адказаў на пытанні старшакласнікаў.

Мікалай НАВУМЧЫК.

Поделиться:
  • 2
  • 1
  •  
  •  
  •  
  •  

Добавить комментарий