Ксёндз Юрый Хіневіч віншуе з радасным і збаўчым святам Нараджэння Хрыстова

Кожная каталіцкая сям’я ў перыяд Адвэнту пачынае рыхтавацца да Божага Нараджэння, але кожная робіць гэта на свой лад. Добра, калі бацькі паважаюць традыцыі і погляды Касцёла, але кепска, калі рэлігійным выхаваннем дзіцяці зай­маюцца толькі хросныя бацькі ці ўвогуле бабуля з дзядулем, або нават не займаецца ніхто. Усе любяць і чакаюць свята Божага Нараджэння.

Божае Нараджэнне – адно з галоўных святаў, і адносіны да яго, і разуменне яго сэнсу не прыйдуць да ўсіх самі па сабе. Касцёл, школа веры – гэта падмурак, вельмі істотны, але будаваць на ім павінны бацькі. Тое, што канкрэтна будуць святкаваць нашы дзеці і мы, залежыць найперш ад нас.

Самае галоўнае, каб мы і нашы дзеці разумелі,  што Пан Езус нарадзіўся дзеля таго, каб потым мог нарадзіцца кожны з нас. Укрыжаваны за нас таксама быў Езус, а не Санта і не Дзед Мароз. Божае Нараджэнне – гэта вялікая перамога святла над цемраю. Пусціце Пана Езуса нарадзіцца ў сваім сэрцы і распавядзіце ўсім пра жывога Хрыста на прыкладзе асабістай жывой веры!

З нагоды Святаў Божага Нараджэння жадаем ўсім Божага Спакою і Радасці, якія б напаўнялі нашы сэрцы і сэрцы нашых блізкіх. Няхай гэты радасны час міне ў цёплай, сямейнай атмасферы.

Няхай Бог, які ёсць любоў, удзеліць усім вам у гэтыя дні святла і спакою, любові і ўзаемнай добразычлівасці, а таксама няхай будзе сярод вас.

 Няхай бэтлеемская зорка, якая аб­вясціла Нараджэнне Збаўцы,  асвятляе сваім ззяннем не толькі святочны час, але таксама ўсе дні Новага 2023 года.

Са Святам Раства Хрыстова!

Кс. Юрый Хіневіч,

пробашч Рыма-каталіцкай парафіі Звеставання Найсвяцейшай Панны Марыі ў Маларыце.