Чарговая ўзнагарода Маларыцкай раённай бібліятэкі
Падведзены вынікі абласнога туру VIІ рэспубліканскага конкурсу “Бібліятэка – цэнтр духоўнай асветы і выхавання”. У намінацыі “Гісторыя праваслаўя роднага краю” дыпломам другой ступені ўпраўлення культуры Брэсцкага аблвыканкама ўзнагароджаны аддзел маркетынгу Маларыцкай раённай бібліятэкі.
На суд журы была даслана работа “Праваслаўныя храмы Маларытчыны”. Яна змяшчае поўную інфармацыю пра ўсе праваслаўныя храмы (у тым ліку і тыя, якія знаходзяцца на могілках) Маларыцкай царкоўнай акругі. Гісторыя кожнага з іх прадстаўлена асобнай брашурай, ілюстраванай фотаздымкамі. Ва ўсіх шаснаццаці выданнях матэрыял размяшчаўся ў наступнай паслядоўнасці: апісанне архітэктурнага выгляду будынка царквы, яе гісторыя, храналогія служэння святароў у храме.
Між іншым, першыя напрацоўкі ў раённай бібліятэцы пра гісторыю цэркваў Маларытчыны з’явіліся яшчэ ў 2006 годзе. Аднак дэталёвая праца пачалася ў другой палове 2017 года. Яна вялася сумесна з кандыдатам багаслоўскіх навук, благачынным Маларыцкай царкоўнай акругі, протаіерэем Віктарам Паляціла.
Мікалай НАВУМЧЫК.
