Маларытчанка Валянціна Струнец пабывала у Маскве на здымках праграмы “Капітал-шоу «Поле цудаў»”

Дзень 19 снежня 2021 года стаў адным з самых памятных, яркіх і незабыўных дзён у жыцці загадчыцы Маларыцкага раённага цэнтра народнай творчасці Валянціны Струнец. Яна, першая і пакуль адзіная з жыхароў раёна, каму пашчасціла пабываць у Маскве на здымках праграмы “Капітал-шоу «Поле цудаў»”.

– Валянціна Мікалаеўна, як вы трапілі на “Поле цудаў”?

– Напачатку снежня гэтага года па запрашэнні грамадскай арганізацыі “Федэральная нацыянальна-культурная аўтаномія беларусаў Расіі” пры падтрымцы Пасольства Рэспублікі Беларусь у Расійскай Федэрацыі, Міністэрства культуры Рэспублікі Беларусь, Федэральнага агенцтва па справах  нацыянальнасцей Расійскай Федэрацыі дэлегацыя Маларытчыны, у складзе якой была і я, прымала ўдзел у Маскве ў міжнародным фестывалі “Беларусы запрашаюць сяброў”. Падчас гэтага мерапрыемства мне прапанавалі прыняць удзел у гульні “Поле цудаў”. Безумоўна, трохі нават сумнявалася. Аднак,  параіўшыся з начальнікам аддзела ідэалагічнай работы, культуры і па справах моладзі райвыканкама Галінай Стасюк, згадзілася пабываць на “Полі цудаў”. Такі шанц выпадае, напэўна, раз у жыцці. Вярнуўшыся ў Маларыту з міжнароднага фестывалю, праз тыдзень зноў стала збірацца ў Маскву, каб прыняць удзел у праграме “Поле цудаў”. Да паездкі  рыхтаваліся, як кажуць,  усім светам. Дзякуй за падтрымку кіраўніцтву грамадскай арганізацыі “Федэральная нацыянальна-культурная аўтаномія беларусаў Расіі”,  Брэсцкаму аблвыканкаму,  Маларыцкаму райвыканкаму,  аддзелу ідэалагічнай работы, культуры і па справах моладзі нашага райвыканкама.

Запіс пераднавагодняй святочнай праграмы праходзіў 19 снежня з 18.00 да 21.00 па маскоўскім часе. З трохга­дзіннага адзнятага матэрыялу ў эфір выйдзе, па словах Валянціны Струнец, стандартны выпуск “Поля цудаў”, працягласць якога разам з рэкламай  складае 70-75 хвілін.

– Я нiколi раней не прымала ўдзел у здымках такіх шоу-праграм, – гаворыць Валянціна Мікалаеўна. – Таму з самага пачатку трошкі нават хвалявалася. Сюрпрыз мяне чакаў адразу ў студыі,  дзе праводзіліся здымкі праграмы. Мне паведамілі,  што я буду іграць  у першай тройцы пад нумарам адзін.

Пасля таго, як зрабіла першы ход “барабанам”, павіншавала ўсіх беларусаў з Новым годам, у студыю запрасіла сваю групу падтрымкі з музычным нумарам. Яго падрыхтаваў і падарыў гледачам дуэт салістаў народнага ансамбля песні і музыкі “Хаціславяне” ў складзе Віктара Галавія і  Вольгі Ківачук. Яны ўжывую цудоўна выканалі беларускую народную песню “Ой, зіма-зіма” з рэпертуару  “Хаціславян”, якая для праграмы была падабрана сумесна з загадчыкам Хаціслаўскага СДК Галінай Хомік.

Дарэчы, Валянціна Струнец на запіс праграмы выйшла ў касцюме Маларыцкага строю адзення, які сама ж і выткала па адноўленай тэхналогіі “кажушком”. Вольга Ківачук на сцэне выступала ў аўтэнтычным касцюме таксама нашага строю адзення, Віктар Галавій – у тканым касцюме, які выраблены майстрамі Маларыцкага раённага цэнтра народнай творчасці.

– У час выступлення калег я назірала за гледачамі ў зале, – кажа Валянціна Мікалаеўна. – Яны, як і Леанід Якубовіч, былі зачараваны і нашым нацыянальным адзеннем, і выкананнем народнай песні. Падчас праграмы расказвала і пра народнага майстра Сцепаніду Сцепанюк з Дарапеевіч,  і пра адноўленую ёю тэхналогію ткацтва “кажушком”, а таксама і пра сам Маларыцкі строй адзення.

– Валянціна Мікалаеўна,  па традыцыі на “Полі цудаў” дораць розныя падарункі і пачастункі. З чым прыехалі вы на праграму?

– Так, усе прыязджаюць на праграму з па­дарункамi. Не з пустымі рукамі завіталі на капі­тал-шоу і мы. Па-пер­шае, на “Поле цудаў” мы везлі падарункі ад старшыні аблвыканкама Юрыя Шулейкі (набор травяных чаёў з Белавежскай пушчы, набор кобрынскіх сыроў), па-другое, шмат падарункаў было і ад Маларыцкага раёна. Гэта найперш тое, што вылучае наш рэгіён сярод іншых: грачаны хлеб,  кашулю  тканую мужчынскую для самога Леаніда Якубовіча, саламяны капялюш,  тканы пояс і  ляльку,  апранутую ў адзенне Маларыцкага строю,  маларыцкія ручнікі,  зразы бульбяныя з паштэтам, смятану,  сала, напой,  прыгатаваны на 18 травах,  а таксама – кошык вітаміннай прадукцыі – дзіцячае харчаванне  ад  Маларыцкага кансервавагародніна­сушыльнага камбіната. Акрамя таго, я перадала Леаніду Якубовічу ад імя грамадс­кай арганізацыі “Федэральная нацыянальна-культурная аўтаномія беларусаў Расіі” сертыфікат, які засведчыў, што ён з’яўляецца ганаровым членам гэтай арганізацыі,  а яшчэ – запрашэнне ад губернатара Брэсцкай вобласці Юрыя Шулейкі,  адрасаванае асабіста Леаніду Якубовічу,  прыняць удзел у фестывалі-кірмашы “Берас­цейскія сані”.

Праграма “Поле цудаў” была прысвечана Новаму году. Ва­лянціне Струнец падчас яе давялося толькі два разы пакруціць барабан.

– Безумоўна, хацелася б вы­йсці ў фінал гульні і мне, – са шкадаваннем кажа Валянціна Мікалаеўна. – Аднак удача не ўсміхнулася, мне не пашанцавала. Зрэшты, я ехала найперш за станоўчымі эмоцыямі, добрым настроем. Гэта якраз і атрымала.

Ад капітал-шоу «Поле цу­даў» маларытчанка атрымала некалькі па­­дарункаў. Гэта тэлевізар з вад­ка­крышталічным экранам,  сімвал 2022 года – мяккую цацку – тыграня,  набор цуке­рак,  бутэльку шампанскага, букет кветак. Дарэчы, тэлевізар Валянціна Струнец вырашыла перадаць у карыстанне Маларыцкаму раённаму цэнтру народнай творчасці. Акрамя таго, яна яшчэ атрымала кубак з выявай Леаніда Якубовіча як ігрок, які не выйшаў у фінал.

Напрыканцы запісу праграмы “Поле цудаў” Валянціна  Мікалаеўна яшчэ раз усіх на беларускай мове павіншавала з Новым годам, які наступае.

* * *

У эфір праграма “Ка­пітал-шоу «Поле цудаў»” з удзелам Валянціны Струнец і яе групы пад­трымкі выйдзе на тэлеканале АНТ 30 снежня ў 18.45.