Маларыцкі хлебазавод выпускае  да 4 тон высакаякасных хлебабулачных вырабаў за суткі

Прадукцыя хлебазавода Маларыцкага райспажыўта­варыства карыстаецца попытам не толькі ў жыхароў Маларытчыны. Аб гэтым сведчыць, напрыклад, такі факт, што  больш за 50% хлебабулачных і кандытарскіх вырабаў рэалізуецца за межамі раёна, задавальняючы таксама пакупніцкі попыт насельніцтва ў Брэсце і Брэсцкім раёне, Жабінцы і Жабінкаўскім раёне, у тым ліку – і ў гандлёвых сетках магазінаў “Санта”, “Бакалея” і “Еўрагандаль”. Маларыцкі хлеб заўсёды духмяны, пышны, смачны,  апетытны, з непаўторным водарам.

– Прадпрыемстваў, якія выпускаюць хлеб па адной рэцэптуры і стандартах, многа, аднак смак атрымліваецца розны. Проста ўсё трэба рабіць з душой, з любоўю, – гаворыць  начальнік лабараторыі хлебазавода Галіна Сулім. – Мы прывыклі працаваць менавіта так. Мы любім тое, што робім. Таму і вынік адпаведны.

За суткі  маларыцкі хлебазавод выпускае  ў сярэднім да 4 тон высакаякасных хлебабулачных вырабаў.  У асартыменце цяпер налічваецца 12 найменняў хлеба (жытнёва-пшанічны (чорны), 8 – чарэневых, 4 – фармавых) і амаль 40 – булачных. Асноўны аб’ём прадукцыі выпякаецца ноччу,  каб ранкам свежы хлеб паступіў ў гандлёвыя кропкі.

– Уся наша прадукцыя выраб­ляецца выключна з натуральнай сыравіны,  – кажа Галіна Сулім. – Замес хлеба адбываецца на аснове густых натуральных заквасак, з чыстай сыравіны без дамешак, разрыхляльнікаў і фарбавальнікаў. Аснова нашага поспеху – у няўхільным выкананні дзяржаўных стандартаў і тэхналагічных нормаў, закладзеных яшчэ ў 80-я гады мінулага стагоддзя. Прадукцыя пры гэтым выпякаецца на сучасным абсталяванні.

– Галіна Гаўрылаўна, ці ёсць навінкі хлебабулачных вырабаў?

– Ёсць. Сёння існуе канкурэнцыя ў хлебабулачнай галіне. Удала заняць рынак і трывала замацавацца ў ім няпроста. Для гэтага неабходна ісці ў нагу з часам,  задавальняць густы пакупнікоў. Таму мы пастаянна вывучаем “хлебныя” перавагі пакупнікоў, вядзем пошук новых рэцэптаў і ўдасканальваем старыя. Пры гэтым якасць прадукцыі па-ранейшаму абавязкова адпавядае ДАСТам і прынятым тэхнічным умовам. Хлебазавод пастаянна імкнецца прапаноўваць новыя віды хлебабулачнай прадукцыі. Напрыклад,  нядаўна наладзілі вытворчасць цэльназерневага хлеба  “Купец” і  хлеба “Братонскі грэчневы з грэчневай сумессю”.

– Цяпер у вернікаў ідзе Калядны пост. Якую посную  прадукцыю выпускае хлебазавод?

– Мы працуем на спажыўца і клапоцімся пра тое,  каб на яго стале заўсёды былі высакаякас­ныя хлебабулачныя вырабы роз­ных назваў і гатункаў. Не забываем і пра тых, хто прытрымліваецца посту. Асартымент  поснай прадукцыі цяпер налічвае 15 найменняў. Хлебазавод прапаноўвае, напрыклад,  хлеб пшанічны “Данскі” і “Ура­джайны” (з разынкамі),   булкі “Сельская” і “Яраслаўна” (з буякамі), пышкі “Маларыцкія” (з разынкамі),  пампушкі “Маларыцкія з водарам”, булачку “Да булёну”,  булачку з памадкай “Сонечная”,  сухары “Летнія”, пернікі “Дняпроўскія”,  язычкі “Мікс”,  каўрыжку “Фестывальная”, ласункі мучныя “Залацістыя” і “Усходнія”,  багет “Сталовы”. Выбар багаты.

Мікалай  НАВУМЧЫК.