Ва ўстановах адукацыі працягваецца паэтапнае ўвядзенне школьнай формы

Летнія канікулы ў разгары. Бацькам самы час цяпер падумаць пра школьную форму сваіх дзяцей. Праўда, сёлета, як і ў мінулым годзе, неабходна звярнуць увагу на адзін нюанс.

Ва ўстановах адукацыі працягваецца паэтапнае ўвядзенне школьнай формы. У аддзеле па адукацыі райвыканкама патлумачылі, што да гэтага няма жорсткіх патрабаванняў. Размова ідзе пра паступовы пераход на афіцыйна-дзелавы стыль.

У мінулым навучальным го­дзе ва ўстановах адукацыі быў уве­дзены адзін абавязковы элемент, які адрознівае вучняў адной школы ад іншых. З 1 верасня гэтага года ўстановы адукацыі павінны  ўвесці чарговы элемент адзення. Гэта можа быць, напрыклад, камізэлька, пінжак пэўнага колеру ці фасону, штаны, гальштук… З адна­го боку, гэта адметны знак, а з другога – дапамога ў фар­міраванні і выхаванні ў вуч­няў пачуцця гонару за сваю ўстанову адукацыі. Такі адметны знак таксама паспрыяе згуртаванню вучнёўскага калектыву.

Ва ўстановах адукацыі ўсе неабходныя рашэнні прымаюцца калегіяльна – кіраўніцтвам, педагагічнымі калектывамі, бацькамі. Вядома, улічваюцца і меркаванні вучняў. У раённай гімназіі, напрыклад, першым элементам школьнай формы быў гальштук, у СШ №1 – гальштук і эмблема, у СШ №2 – чорны жакет. У новым навучальным годзе ў гэтых установах адукацыі ўводзіцца другі элемент:  штаны (спадніца) чорнага колеру – у раённай гімназіі, штаны (спадніца) чорнага колеру – у СШ №1, эмблема – у СШ №2.

Дарэчы, каталог «Школьная калекцыя» прадстаўлены на сайце канцэрна «Беллегпрам». Тут можна ўбачыць узоры адзен­ня дзелавога стылю ААТ «Палессе», «Світанак», «Жлобінская швейная фабрыка», «Славянка», «Купалінка», «Алеся», «БелКрэда», ЗАТ «Калінка». На сайце канцэрна таксама прадстаўлены ўзоры абутку дзелавога стылю,  адзенне спартыўнага стылю і галантарэйныя вырабы для вучняў устаноў адукацыі. Уся прадукцыя – беларускіх вытворцаў, прыгожая, якасная, зручная.

Мікалай  НАВУМЧЫК.