Новае аблічча старых дарог Маларытчыны

На Маларытчыне шмат робіцца па рамонце і добраўпарадкаванні дарожнага пакрыцця. Шляхі зносін, якія па тэрыторыі раёна былі пракладзены шмат гадоў таму,  паступова набываюць новае сучаснае аблічча. Запланаваныя работы паэтапна праводзяцца ў адпаведнасці з “Праграмай па бягучым рамонце аўтамабільных дарог Маларыцкага раёна на 2024 год” сіламі Маларыцкага дарожнага рамонтна-будаўнічага ўпраўлення №179 КУП “Брэстаблдарбуд”.

Апошняе таму пацвярджэнне – бягучы рамонт аўтамабільнай дарогі Н-773 Хаціслаў – Отчын – Добрае – Перавое. Будзе абноўлена 2 кіламетры 9 метраў дарожнага пакрыцця. Для выканання неабходнага аб’ёму работ (ахова пакрыцця пераходнага тыпу)  з абласнога бюджэту будзе затрачана больш за 767 тысяч рублёў.

Па словах прараба Валерыя Захарчука, укладка асфальта-бетоннага пакрыцця на ўчастку дарогі будзе завершана да канца сакавіка. З камфортам па абноўленай дарозе можна будзе праехаць з аграгарадка Арэхава ў аграгарадок Хаціслаў.

Па словах начальніка Маларыцкага ДРБУ № 179 Юрыя Алексеюка,  плануецца, што за 2024 год у раёне  будзе абноўлена 18,9  кіламетра мясцовых дарог.

Мікалай  НАВУМЧЫК.

Фота Алега Крэмянеўскага.