В Малоритском районе прошёл семинар преподавателей воскресных школ
У Нядзельнай школе пры храме свяціцеля Мікалая Цудатворцы Маларыты прайшоў чарговы семінар для выкладчыкаў нядзельных школ раённага благачыння.
У яго рабоце прыняў удзел благачынны прыходаў Маларыцкай акругі, кандыдат багаслоўскіх навук, протаіерэй Віктар Паляціла, старшыня аддзела па рэлігійнай адукацыі і катэхізацыі Брэсцкай епархіі протаіерэй Яўген Ліхота, метадыст Таццяна Брашка, а таксама святары, якія выкладаюць у нядзельных школах, і самі выкладчыкі.
Спачатку прысутныя наведалі адкрыты ўрок па тэме “Царкоўная іерархія. Аблачэнне святароў” у 1 класе. Яго правёў выкладчык Нядзельнай школы пры храме свяціцеля Мікалая Цудатворцы Маларыты Яўген Радчык. Затым выступіў протаіерэй Яўген Ліхота і метадыст Таццяна Брашка.
Падчас работы семінара таксама былі абмеркаваны актуальныя і надзённыя пытанні. Гэта, напрыклад, дакуметальнае забеспячэнне адукацыйнага працэсу ў нядзельных школах, тыпавое палажэнне аб нядзельных школах, стварэнне груп сумеснага чытання Свяшчэннага Пісання. Асобна разглядалася пытанне аб развіцці краязнаўства. Напрыканцы работы семінара адбыўся абмен вопытам работы.
Мікалай НАВУМЧЫК.