Аблічбаваны яшчэ адзін помнік Вялікай Айчыннай вайны
На Маларытчыне 19 кастрычніка аблічбаваны яшчэ адзін помнік Вялікай Айчыннай вайны. На гэты раз – брацкая магіла савецкіх воінаў, партызан і ахвяр фашызму, якая знаходзіцца на перасячэнні вуліц Леніна і Паркавая ў скверы ля Вялікарыцкай СШ. З гэтай нагоды тут адбыўся ўрачысты мітынг.
Аблічбоўка адбылася ў рамках рэалізацыі міжнароднага беларуска-расійскага гісторыка-патрыятычнага праекта “Лічбавая зорка” пры непасрэдным удзеле раённага камітэта грамадскага аб’яднання “БРСМ”.
– Гэты праект створаны для збору інфармацыі аб помніках Вялікай Айчыннай вайны, – гаворыць першы сакратар РК ГА Марыя Горнік. – Сутнасць яго – расказаць моладзі мовай сучасных электронных гаджэтаў аб падзеях і героях Вялікай Айчыннай вайны. Для гэтага адпаведная інфармацыя аблічбоўваецца, а таблічкі з QR-кодам размяшчаюцца ля памятных месцаў, звязаных з падзеямі Другой сусветнай вайны – помнікаў, абеліскаў… Акрамя таго, міжнародны праект накіраваны на фарміраванне духоўна-маральных, грамадзянскіх якасцей асобы, на развіццё цікавасці і павагі да помнікаў баявой славы, якія ўвекавечылі трагічныя і гераічныя падзеі мінулага, захаванне гісторыка-культурнай спадчыны Беларусі. “Лічбавая зорка” зацікавіць тых, хто хоча ведаць больш пра гісторыю Вялікай Айчыннай вайны і слаўны, гераічны і трагічны шлях, які прайшоў савецкі народ да Дня Вялікай Перамогі.
На мітынгу ў аг.Вялікарыта прысутнічалі вучні і настаўнікі ўстановы адукацыі, прадстаўнікі грамадскіх аб’яднанняў. Падчас урачыстасці выступіў старшыня раённага Савета дэпутатаў Алег Якубчык, а таксама старшыня раённага савета грамадскага аб’яднання “Беларуская рэспубліканская піянерская арганізацыя” Клаўдзія Буян і вучаніца 11 класа Вялікарыцкай СШ Крысціна Краўчук. Затым Алег Якубчык і Крысціна Краўчук замацавалі на стойцы з правага боку ля ўваходу да помніка стылізаваную таблічку з QR-кодам.
Пасля хвіліны маўчання прысутныя ўсклалі кветкі да помніка.
* * *
У магіле ў скверы ў аг.Вялікарыта пахаваны 54 воіны і партызаны, якія загінулі ў баях супраць нямецка-фашысцкіх захопнікаў у 1941-1944 гадах, і 11 мірных жыхароў в.Гусак, якія расстраляны ў 1942 годзе гітлераўцамі. На месцы пахавання ўстаноўлены помнік – скульптура воіна. У брацкай магіле снайшлі свой апошні спачын 30 чалавек: 16 вядомых і 14 невядомых. Акрамя таго, манумент ушаноўвае памяць мясцовых жыхароў, якія змагаліся за вызваленне Беларусі ад нямецка-фашысцкіх захопнікаў. Сюды ж у 1958 годзе з в. Антанова быў перазахаваны стралок-радыст Канстанцін Сяргеевіч Цыркуноў.
Мікалай НАВУМЧЫК.