Месца творчай прапіскі – ГДК (Маларыцкі раён)
На Маларытчыне шмат здольных ад прыроды хлопчыкаў і дзяўчынак. Калі мэтанакіравана развіваць дзіцячыя здольнасці, то іх можна ператварыць у сапраўдныя таленты. Што для гэтага трэба? Найперш, жаданне. Аднак аднаго жадання тут мала. Па-другое, неабходны адпаведныя кадры. Ці ёсць яны ў Маларыце? Безумоўна. Кваліфікаванымі кадрамі наш раён забяспечаны. Тады куды звяртацца? Раім накіравацца, напрыклад, у ГДК. Тут з верасня 2018 года дзейнічае дзіцячы вакальны ансамбль “Забава-mini”, якім кіруе Алена Свішчова.
– Калектыў задумваўся і ствараўся з мэтаю развіцця песенных здольнасцей дзяцей ва ўзросце ад 5 да 8-9 гадоў, –гаворыць Алена Фёдараўна. – Маю ідэю падтрымаў кіраўнік дзіцячай узорная эстраднай студыі “Забава” Аляксандр Барысюк. Справа ў тым, што салісты яе вырастаюць і разлятаюцца хто куды. Амаль штогод у “Забаву” прыходзяць новыя салісты. Аднак часта бывае так, што ўзровень падрыхтоўкі пачаткоўцаў не заўсёды адпавядае тым патрабаванням, якія існуюць у студыі. Каб падцягнуць іх да належнай вышыні, патрэбна затраціць шмат часу. Каб працэс папаўнення і ўваходжання ў калектыў быў зведзены да мінімуму, каб не знізіўся прафесійны ўзровень выканання салістаў, і было вырашана стварыць вакальны дзіцячы ансамбль “Забава-mini”. Асноўная задача, якая на яго ўскладваецца, – якасная падрыхтоўка новых салістаў, якая найперш заключаецца ў атрыманні (калі можна так сказаць) неабходных базавых песенных ведаў, уменняў і навыкаў.– Алена Фёдараўна, няўжо ўсе вашы сённяшнія вакалісты будуць пасля спяваць у “Забаве”?
– Такую задачу перад сабой мы не ставім. Першы наш набор – дзеці, якім ужо споўнілася пяць гадоў. Аднак некаторыя на заняткі перасталі хадзіць праз тры-шэсць месяцаў. На гэта мы рэагуем спакойна. На іх месцы прыйшлі іншыя дзеці, якія захацелі займацца вакалам. Дарэчы, Ангеліна Шарамава, Вераніка Свішчова і Марыя Салавей цяпер маюць вялікае жаданне быць салістамі “Забавы”.
На занятках, якія право-дзяцца два разы на тыдзець, мы не толькі спяваем. Згодна з праграмай, шмат часу пачаткоўцы-вакалісты працуюць над пастаноўкай дыхання. Яно павінна быць правільным. Значная ўвага ўдзяляецца дыкцыі, артыкуляцыі гукаў, якія вымаўляюцца. І толькі пасля ўжо дзеці спрабуюць “правільна”спяваць і развучваюць прасцейшыя рухі.
Між іншым, на заняткі да Алены Свішчовай ходзяць дзеці не толькі для таго, каб навучыцца спяваць правільна і прыгожа. Некаторыя з іх наведваюць заняткі з мэтай пазбавіцца пэўных лагапедычных дэфектаў. Такія прыклады ёсць.
“Забава-mini” – калектыў малады. Яркіх афіш, гастрольных тураў і самастойных канцэртаў пакуль у вакальнага ансамбля не было. Гэта ўсё яшчэ наперадзе. Першую сваю творчую песенную справа-здачу “Забава-mini” трымала на бацькоўскім сходзе. Хваляваліся ўсе. Аднак выступленне атрымалася яркім, незабыўным і сабрала авацыі гледачоў. Дэбютным для вакальнага дзіцячага калектыву стала выкананне песні падчас каляднага ранішніка ў мінулым годзе на сцэне ГДК. Праўда, яшчэ “Забава-mini” выступала некалькі разоў на ранішніках у дзіцячых садах горада.
– Алена Фёдараўна, на ваш погляд, што дае калектыў яго ўдзельнікам?
– Найперш, дысцыплінуе, вучыць адчуваць сябе часткаю калектыву, працаваць у ім на агульны вынік, выпрацоўвае ўменне слухаць і чуць, трымацца на сцэне.
– Дзе можна знайсці вас?
– Месца “прапіскі” вакальнага ансамбля “Забава-mini” – ГДК. Дакладней, другі паверх, кабінет № 36. Заняткі праходзяць кожны тыдзень у аўторак і сераду. Між іншым, у верасні пачнецца новы набор у вакальны ансамбль “Забава-mini” дзяцей ва ўзросце 5-6 гадоў. Запрашаем!
Мікалай НАВУМЧЫК.