На адміністрацыйным будынку Маларыцкага лясгаса ўсталявана памятная дошка заслужанаму лесаводу БССР Аляксандры Агароднікавай
Нядаўная на адміністрацыйным будынку Маларыцкага лясгаса была адкрыта памятная дошка заслужанаму лесаводу БССР Аляксандры Агароднікавай. Аляксандра Уласаўна пакуль адзіны работнік, які за ўсю гісторыю існавання лесагаспадарчага прадпрыемства раёна ўганараваны такім высокім званнем.
На ўрачыстай цырымоніі адкрыцця прысутнічала адміністрацыя і супрацоўнікі лясгаса, ветэраны галіны, родныя Аляксандры Агароднікавай.
– Памятная дошка з’явілася ў гонар нашага сучасніка, – адзначыла намеснік дырэктара па ідэалагічнай рабоце Маларыцкага лясгаса Людміла Губей, – які не змагаўся з ворагам на вайне, а праславіўся выключна сваёй стараннай і самаадданай працай. Памятная дошка ўстаноўлена былому работніку лясной гаспадаркі за асаблівы ўклад у развіццё галіны. Мы ганарымся, што ў нашым калектыве шмат гадоў працаваў такі выдатны чалавек!
Пасля выканання Дзяржаўнага гімна Рэспублікі Беларусь і гімна лесаводаў выступілі генеральны дырэктар Брэсцкага дзяржаўнага вытворчага лесагаспадарчага аб’яднання Анатоль Леванюк, начальнік аддзела ідэалагічнай работы і па справах моладзі Маларыцкага райвыканкама Галіна Стасюк, былы работнік лясніцтва Сяргей Карповіч, які шмат гадоў працаваў разам з Аляксандрай Уласаўнай, а таксама яе ўнук Аляксандр Хевук і пляменнік Андрэй Ермалаеў.
Права адкрыць памятную дошку атрымалі Анатоль Леванюк і Сяргей Карповіч. Яны пад апладысменты прысутных знялі тканіну з памятнага знака. Да памятнай дошкі былі ўскладзены жывыя кветкі.
Аляксандра Агароднікава нарадзілася 24 студзеня 1928 года ў вёсцы Дзедуны Полацкага раёна. У 1948 годзе скончыла Полацкі лясны тэхнікум і на першае месца працы была накіравана ў Маларыцкае лясніцтва. Спачатку яна працавала памочнікам ляснічага, а з 13 верасня 1949 года – ляснічым. На гэтай пасадзе яна шчыравала да 11 студзеня 1988 года. За старанную і добрасумленную працу ў 1977 годзе Указам Прэзідыума Вярхоўнага Савета БССР ёй прысвоена званне «Заслужаны лесавод БССР». У 1978 годзе Аляксандра Агароднікава яшчэ атрымала званне ляснічага першага класа. Жанчына разам з мужам Пятром Крачыкам выгадавала дачку Таццяну і сына Сяргея. Адышла Аляксандра Агароднікава ў іншы свет 14 ліпеня 2007 года.
Мікалай НАВУМЧЫК.
Фота аўтара.