Пераможцы другога этапу рэспубліканскага конкурсу прафесійнага майстэрства педагагічных работнікаў «Настаўнік года»
На Маларытчыне падведзены вынікі другога этапу рэспубліканскага конкурсу прафесійнага майстэрства педагагічных работнікаў «Настаўнік года». У намінацыі «Пачатковыя класы» пераможцам стала настаўніца СШ №1 Валянціна Бурда, у намінацыі «Выхавальнік дашкольнай адукацыі» – выхавальнік дзіцячага сада №6 Вольга Пашковіч.
На завочным этапе педагогі прадстаўлялі творчую прэзентацыю: апісанне вопыту работы, відэапрадстаўленне педагагічнай дзейнасці з адлюстраваннем асноўных накірункаў і вынікаў педагагічнай дзейнасці. Вочны этап прадугледжваў правядзенне адкрытых урокаў (заняткаў) у знаёмым і незнаёмым класе (групе).
Валянціна Бурда – настаўніца 2 «В» класа. Яна мае першую кваліфікацыйную катэгорыю, 13 гадоў педагагічнага стажу. Першае працоўнае месца – Макранская СШ. Абагульніла вопыт работы на тэму «Развіццё творчых здольнасцей малодшых школьнікаў на ўроках літаратурнага чытання».
Вольга Пашковіч – выхавальнік старэйшай спецыяльнай групы з цяжкімі парушэннямі мовы, мае першую кваліфікацыйную катэгорыю, педагагічны стаж яе складае 16 гадоў. Працоўную дзейнасць пачынала ў Дзівінскім яслях-садзе Кобрынскага раёна. На суд журы прадставіла вопыт работы на тэму «Развіццё творчых здольнасцей выхаванцаў з выкарыстаннем розных тэхнік малявання».
Мікалай НАВУМЧЫК.
Фота аўтара.